17-anyos nga estudyante nga babaye sa Guimaras, gintuyo nga i-abduct

Guimaras — Indi makapat-od ang mga pulis sa report nga gintuyo i-abduct ang 17-anyos nga estudyante nga babaye sa Jordan, Guimaras. Suno kanday Senior Inspector Edwin Belarmino, hepe sang Jordan Police Station kag Senior Inspector Jeffrey Ferrer, hepe sang Buenavista Police Station, mas maayo kon ang driver sang yellow nga pick-up nga ginpahayag ginasakyan sang estudyante ang makareport sa police agud makasaysay sang natabu. Ginpahayag nagsakay sa tricycle si alyas Inday halin sa eskuwelahan sang Oktubre 10, las 3 sang hapon agud magpadul-ong sa Barangay Alibhon, Jordan apang natingala sang nagdiretso sa Buenavista ang salakyan. Nagpamangkot pa si Inday kun ngaa nagapakadtu sa Buenavista ang tricycle apang naghambal ang duha ka babaye nga pasahero nga madali lang sila. Nakulbaan si Inday sang nagpalayo ang tricycle kabangdanan nag-text sa iloy sang iya nobyo kag naghambal nga pangitaon siya. Isa sa mga babaye nga pasahero sa tricycle ang ginpahayag nag-uyat sa buhok ni Inday kag naghambal nga may kadtuan sila. Samtang yara sa San Roque, Buenavista, ginpahayag nalabayaran sang yellow nga pick-up kag nakita sang driver nga may kinagamo sa sulod sang tricycle. Ginpasakay si Inday sa pick-up kag ginpapanaug sa Barangay Alaguisoc, Jordan, Guimaras. (JoMaque)