Anay LP President Mar Roxas, nagsabat sa akusasyon nga drug protector siya

Iloilo City — Nanginwala si anay Liberal Party President Manuel ‘Mar’ Roxas II sa akusasyon nga drug protector siya.  Reaksyon ini ni Roxas sa affidavit sang drug suspect nga si Ricky Serenio sang Negros Occidental nga nagatudlo sa ila nanday Senador Franklin Drilon kag Mayor Jed Patrick Mabilog nga drug protectors. Suno kay Roxas, wala siya naka-agi nga na-atubang si Serenio kag bisan ang napatay nga si PDEA identified drug group leader Melvin Odicta.   Ginpanindugan ni Roxas nga nagbato siya sa illegal drugs kag makita ini sa mga record sang pag-aresto kag buy bust operations sang Philippine National Police sang siya pa ang DILG secretary. Ginpabutyag ni Roxas nga kahimuan sang mga KSP sa Negros ang pagdalahig sa iya sa illegal drugs agud nga makapangayo sang pabor kay Presidente Rodrigo Duterte. Ginpahayag pa ni Roxas nga nakahibalo ang mga taga-Western Visayas sang iya matinlo nga record. (JoMaque)