Mag-asawa nga Muslim nga nagabaligya sa Mandurriao Plaza kag ila 5 ka bulan nga bata nga lalaki, gin-martilyo; Bata, patay

Iloilo City — Ginmartilyo sa ulo ang mag-asawa nga Muslim nga may nagabaligya sa Mandurriao Plaza kag ila lima ka bulan nga bata nga lalaki kaina sang kaagahon.   Ginpahayag nga dead-on-arrival sa Western Visayas Medical Center ang bata bangud sang patal nga pilas sa ulo. Kritikal ang amay nga si Muamar Ditingki, 29-anyos samtang padayon man nga ginabulong ang asawa nga si Asnifah, 21-anyos. Tumandok sang Marawi City ang mga biktima kag temporaryo nga naga-istar sa Zarraga.  Suno sa iban nga negosyante, wala man sang nadula sa kagamitan sang mga biktima.

Nadakpan sa follow up operation sang Mandurriao police ang suspect sa paglampos sang martilyo sa mag-asawa nga Muslim kag ila 5 ka bulan nga bata nga lalaki sa Mandurriao plaza. Ginkilala ang suspect kay Mark Ganava, 28, sang Himamaylan, Negros Occidental. Positibo nga gintudlo sang mga testigo si Ganava nga naghalin sa kiosko sang mag-asawa nga Muslim. Todo panghiwala si Ganava sa akusasyon nga siya ang nag-martilyo sa mga biktima. Ginbantayan sang Mandurriao police sa iya gina-istaran sa Calajunan, Mandurriao si Ganava kag gin-aresto. Yara na sa Mandurriao Police Station ang suspetsado. Gina-imbestigaran sang Mandurriao police ang motibo sa krimen. (JoMaque)