Mga kontrabando, nakumpiskar sa greyhound operation sa BJMP-SICA sa Pototan

Pototan, Iloilo–Nakarecover sang mga kontrabando sa sulod sang Bureau of Jail Management and Penology-Iloilo District Jail  Special Intensive Care Area sa Nanga, Pototan.

Kasunod ini sang greyhound operation nga ginmandu sang bag-o nga warden nga si JSUPT Jhon Montero. 10 ka cellphones, lain-lain nga chargers kag improvised nga mga patalum ang nakumpiskar pagkatapos sang operasyon.

Ginapa-imbestigaran naman ni Montero ang intelligence report nga may personalidad nga tuyo magsuhol sa sin-o man nga inmate nga makapalagyo agud ma-relieve siya. Samtang gina-imbestigaran, may mga tikang na nga ginahimo si Montero pareho sang pagpatindog sang watch tower sa garden area kag pagpaguba sang illegal structures sa likod sang jail facility agud makita ang hulag sang tanan nga inmates. Ginalauman man nga makabakal sang search light ang facility sa masunod nga bulan. (AGB)