Problema sa PECO, hatagan pagtamud ni Presidential Spokesperson Harry Roque Jr

Hatagan importansya ni Presidential Spokesperson Harry Roque Jr ang mga reklamo batuk sa Panay Electric Company (PECO). Ginpasalig ini ni Roque sa interview sang Aksyon Radyo Iloilo paagi kay Aksyon John Sapio sa programa nga Balita, Banat, Bulig kaina sang udto.

Madumduman nga nakalab-ut kay Roque ang mga reklamo antes pa man siya gin-appoint ni Presidente Rodrigo Duterte. Plano ni Roque nga magtukod sang opisina sa Iloilo agud mas madasig ang pagpalab-ut sang mga concerns sang mga Ilonggo sa iya.

Sa pihak nga bahin, ginkalipay ni Roque ang pagsumpa na ni Mayor Joe Espinosa nga alkalde. Ginakabig ni Roque nga abyan si Espinosa lakip na si Councilor Joshua Alim.

Ginapabugal man ni Roque nga Ilonggo siya. Taga-Iloilo ang iloy ni Roque gani ginpabutyag sini nga indi niya pagpabay-an ang mga Ilonggo. (AGB)