Police nga involved sa gun running, nadakpan sa entrapment operation

San Miguel, Iloilo — Nadakpan sa entrapment operation sang gintingub nga puwersa sang San Miguel police kag Special Operations Group sang IPPO sa Barangay San Jose, San Miguel kahapon ang pulis kag iya pakaisa nga nagabaligya sang pusil nga wala sang nagakaigo nga papeles. Nakuha kay Rufino Catedral, 33-anyos sang Brgy. Tuburan, Lambunao ang 45 caliber pistol, isa ka magazine kag 3 ka live ammunitions. Suno kay Inspector Francis Albert Fortunado, hepe sang San Miguel Police Station, gintudlo ni Catedral ang iya pakaisa nga si PO3 Phoebus Batoc, 51 anyos sang Legayada, Lambunao kag assigned sa Camp Crame nga nagsugo sa iya nga magbaligya sang pusil. Ginhimo ang entrapment operation sang namonitor sang informant sang San Miguel Police Station nga naga-engage sa gun running activities sanday Catedral kag Batoc. Narecover ang 500 pesos nga cash, P19,500 nga decoy money kag cellphone. (JoMaque)