Bangud sa away sa duta, magpamilya nagtiruhay sa San Enrique; 2 pilason

San Enrique, Iloilo — Pilason ang magtiyo sang nagtiruhay sa Brgy. San Antonio, San Enrique kaina sang aga. Suno kay Senior Inspector Norbert Sipole, hepe sang San Enrique Police Station, ginkilala ang mga involved sanday Denzil Tedios,41-anyos kag iya mga tiyo nga sanday Edgardo, 51-anyos, kag Henry Alada, 41-anyos, lunsay pumuluyo sang amu nga barangay. Base sa panaysayon ni Tedios suno kay Sipole, una nga ginbangga-an sang iya mga tiyo ang iya motorsiklo. Ginpahayag naman sang mag-utod suno kay Sipole nga sila ang una nga gintiro sang ila hinablos. Padayon nga ginabulong sa ospital sanday Tedios nga may pilas sa wala nga paa kag si Henry nga may pilas sa wala nga kamot kag sag-ang. Preso naman sa San Enrique police station si Edgardo.  Base sa imbestigasyon sang pulis, may daan nga hiligutanon si Tedios kag ang iya mga tiyo may kaangtanan sa ginaawayan nila nga duta.  Narecover sa crime scene ang mga baseho sang 12 gauge shot gun kag 45 caliber pistol. (JoMaque)