Mga city councilors, nagpasugot nga mapresentar ang PECO sang ila mga programa sa konseho

Iloilo City–Hatagan sang tansa sang City Council ang Panay Eelectric Company nga makapresentar sang ila mga programa kag makapaathag sang mga reklamo batuk sa ila sa konseho.

Base ini sa impormasyon nga nakalab-ot kay Vice Mayor Jeffrey Ganzon matapos nagpapirma sang papel sa kada konsehal. Suno kay Ganzon, sanday Councilors Love-Love Baronda kag Lizl Salazar na lang ang wala naka-feedback sa iya apang daku ang posibilidad nga masunod man ang duha ka konsehal sa desisyon sang mayoriya.

Una na ginpabutyag nanday Councilors Joshua Alim kag Plaridel Nava nga indi sila pabor sa hingyo sang PECO.

Sa ginpapirmahan nga papel ni Ganzon, ginapapilian niya sa mga konsehal ang Nobyembre 22 kag 23  nga schedule para pamatian ang PECO.

‘Indi sigurado’

Indi naman sigurado si Councilor Alim kun magatambong sa presentasyon sang PECO. Suno sa konsehal, ginakonsiderar nila ni Councilor Nava ang paghimo sang tikang antes pasugtan ang PECO.

Kun si Alim ang masunod, wala na sang rason agud pasugtan ang PECO nga magtambong sa session bangud makaduha ka beses na sila nga ginbalibaran. Magluwas sini, may ginpasar nga resolution ang city council nga nagapamatok sa renewal sang franchise sang PECO. (AGB)