Councilor Joshua Alim, nakibot sang nahibaluan nga 2nd hearing na sa PECO franchise renewal bill ang hiwaton sa Kamara sa Nobyembre 22

Iloilo City — Nakibot si Councilor Joshua Alim nga ikaduha nga public hearing na ang himuon sang Committee on Legislative Franchises sa petition sa renewal sang franchise sang Panay Electric Company sa Nobyembre 22. Natukiban ini ni Alim sang nakita ang bulletin sang Kamara, Nabutang sa minutes sang una nga hearing sang nagligad nga bulan nga (1) wala sang objection si National Electrification Administration Legal Department Manager Xerxes Adjuara sa proposed law; (2) ginsuportahan ni ERCLegal Counsel Krisha Buela ang bill apang nagapangayo sang dugang nga kaathagan; (3) ginpabalo naman ni former Kabayan Party-List Representative Harry Roque ang komitiba nga may resolution siya nga ginduso nga nagahingyo sang imbestigasyon sa ginpahayag mga iregularidad sa operasyon sang PECO; kag (4) naghisugot ang mayorya sang Komitiba nga mag-imbitar sang representatives halin sa Iloilo City Council, Iloilo Chamber of Commerce kag iban pa nga stakeholders.