Mayor Joe Espinosa, nagkumpirmar sang pag-istoryahanay nila ni Presidente Rodrigo Duterte

Iloilo City–Daw nagalupad sa panganod si Mayor Joe Espinosa matapos sini naka-istorya personal si Presidente Rodrigo Duterte.

Suno kay Espinosa, halos 40 minutos man sila nga nag-istoryahanay sang pangulo sa Malacañang sang Nobyembre 23. Gin-imbitar ni Espinosa ang pangulo sa ika-50 ka tuig sang Dinagyang sa 2018. Gilayon man suno kay Espinosa ginpa-usisa ni Duterte kay Presidential Special Assistant Bong Go kun libre ang iya schedule para sa Dinagyang. Manami man suno sa iya ang yuhom sang presidente kag daku ang posibilidad nga mapadulong ini sa Iloilo.

Wala naman na-istoryahan ang isyu parte sa PECO sa pagkitaay nila ni Duterte. Nabukaran ang isyu sa druga sa diin nahinambit suno kay Espinosa ni Duterte nga indi sini gusto nga may gina-arbor nga durugista ang mayor.

Natalakay man ang pulitika pero wala na nagdetalye pa si Espinosa.

Sa iya Facebook account, nagpost si Espinosa sang picture nila ni Duterte kag sa isa pa gid ka picture kaupod nila sanday Congressman Ferj Biron kag Senator Cynthia Villar nga amo ang ginpangayuan bulig ni Espinosa agud maka-istorya siya sa presidente. (AGB)