Taga-Guimaras nga ginkoronahan Miss Asia Global 2017, nagpasalamat sa tanan nga nagsuporta sa iya

Ginpasalamatan sang taga-Guimaras nga ginkoronahan nga Miss Asia Global 2017 ang tanan nga nagsuporta sa iya.

Suno kay Mary Eve Adeline Escoto, 23-anyos, nangin madinalag-un siya bangud sa suporta kag pangamuyo sang mga Guimarasnon kag Ilonggo. Si Escoto ang tumandok sang Nueva Valencia, Guimaras kag nagatrabaho nga physical therapist.

Ginhiwat ang beauty pageant sa Kerala, India sang Nobyembre 21. Magluwas nga ginkoronahan nga Miss Asia Global 2017, napauli man ni Escoto ang Best in National Costume, Best in Formal Wear kag Missosology Choice awards.

Nakapasakup man si Escoto sa Miss Dinagyang 2017 samtang ang iya pagbisita sa Aksyon Radyo Iloilo amo ang iya labing una nga pagpa-interview sa media matapos siya nagdaug. (AGB)