Turismo sa syudad, indi apektado sang ginaproponer nga liquor ban–DOT 6 Director

Iloilo City–Indi apektado ang turismo sang syudad sa ginaduso nga liquor ban. Reaction ini ni Department of Tourism (DOT) 6 Director Atty. Helen Catalbas sa proposal ni Mayor Jose Espinosa III nga siraduhan ang mga commercial establishments nga nagaserbe sang ilimnon pag-abot sang alas-2 sa kaagahon kag proposed ordinance ni Councilor Joshua Alim nga dumilian ang pagbaligya kag pagbakal sang makahulubog nga ilimnon halin ala-1 sa kaagahon tubtob alas-8 sa aga.

Komporme si Catalbas sa ginsuhestyun nga oras nga idumili na ang pag-inom. Ginpa-athag ni Catalbas nga wala man nagakadtu sa syudad ang mga turista agud mag-inom kag magpahubog. Ang makapalain sa turismo suno sa iya amo ang mga ginabalita nga kinagamo nga makaguba sang imahe sang syudad.

Sa proposal ni Espinosa nga i-exempt ang mga DOT accredited establishments, ginpabutyag ni Catalbas nga may ginapatuman nga seguridad ang mga establisemento para sa ila mga bisita ilabe na kon tungan gab-i tubtub kaagahon. (AGB)