Mayor Joe Espinosa, nagpanawagan sa Board of Directors sang MIWD nga bakantehon ang ila posisyon

Iloilo City — Indi na dapat paghulaton sang Board of Directors sang Metro Iloilo Water District nga mag-expire ang ila termino kag dapat bakantehon nila ang posisyon.  Gintindugan ni Mayor Joe Espinosa ang ginpadala nga cease and desist notice sa MIWD kag ila Board bangud illegal kag void suno sa iya ang ila nga pagpungko. Kasunod ini sang desisyon sang Korte Suprema sa kaso sang Metropolitan Cebu Water District nga nagadeklarar nga unconstitutional sang portion sang Presidential Decree 198 nga nagatumod sa appointing authority sa Board of Directors sang water district. Nagreact si Espinosa kasunod sang pahayag ni Governor Arthur Defensor nga wala sang poder ang alkalde sa pagpahalin sa MIWD Board. Si Defensor ang nag-appoint sang subong nga Board. Plano ni Espinosa nga mag-appoint sang bag-o nga Board sang MIWD.

Action for Prohibition

Ginsuhesytun ni Atty. Nory Pocesion ang pagfile sang action for prohibition batuk sa current Board of Directors sang Metro Iloilo Water District.   Ini ang pinakamaayo nga tikang suno sa abogado agud maathagan kon makapadayon ang Board sang ila functions. Kasunod ini sang ruling ang Korte Suprema sa kaso sang Metropolitan Cebu Water District nga nagadeklarar nga unconstitutional ang probisyon sang laye nga nagatumod sa kon sin-o ang may otoridad sa pag-appoint sang Board of Directors.

Ginpanindugan ni Mayor Joe Espinosa nga siya na ang may appointing authority gani nagpadala sang cease and desist notice sa MIWD kag sa ila Board. Sa opinion ni Pocesion, indi pwede mamanduan ni Espinosa sang cease and desist ang Board bangud trabaho ini sang korte. (JoMaque)