(UPDATE) Isa sa tatlo ka security personnel sang DASIA Security Agency, nag-ako nga nagkasa sang pusil matapos nagbaisay ang iya duha ka kaupod kag traffic enforcer sa Lapaz

Iloilo City–Gin-ako sang isa sa tatlo ka security personnel sang DASIA Security Agency nga nagkasa siya sang pusil sang nagbaisay ang duha niya ka upod nga guwardya kag ang traffic enforcer sa Luna Street, Lapaz kahapon.

Apang gin-athag ni Novie John Azucena nga para lang sa self-defense ang pagkasa niya sang AK-47 kag preparasyon sa kun anu ang matabu ilabe na nga ara sila sa tunga sang karsada kag may dala nga kuwarta ang armored car. Nagapungko sa likod sang salakyan si Azucena upod ang teller sang bangko sang nagdesisyon siya nga maguwa agud i-check ang palibot. Ginpahayag ni Azucena nga naka-alerto lang siya batuk sa posible hold-upper base man sa ila security protocol.

Gin-claim ni Azucena nga ginlambatan ni traffic enforcer Leo Joseph Causing ang armored car, ginsumbag kag ginbulya-bulya tubtub nga nabuksan ang puwertahan. Ini ang rason suno sa iya nga naguwa ang duha niya ka kaupod nga sanday Joemarie Mandahuyan, ang driver sang armored car, kag Romelo Flores kag ginbais ang traffic enforcer.

Suno naman kay Flores, sila pa ang ginbuyayaw ni Causing matapos ginlambatan ang ila ginasakyan nga armored car. Nagpa-athag naman si Mandahuyan nga nagsinyas siya nga maliko sila sa bangko kag wala siya nag-dirty finger sa traffic enforcer. Ginbuksan man sini sang diutay ang puwertahan agud magpaathag kay Causing apang ginwakli suno sa iya sang traffic enforcer ang puwertahan gani napilasan ang iya kamot.

Nagpanawagan si Mandahuyan kay Public Safety and Transportation Management Office (PSTMO) Head Jeck Conlu nga tudluan sang maayo ang iya tinawo angut sa pagdireher sang trapiko.

‘Paathag sang PSTMO’

Desidido si PSTMO head Jeck Conlu nga mag-file sang kaso batuk sa tatlo ka security personnel kasunod sang natabu. Para kay Conlu, ensakto ang ginhimo ni Causing nga pagpangabay sa driver nga mag-U turn sa unhan bangud nagabalabag sa dalan ang armored car gani nagadugang sa pagpugok sang mga salakyan. Gindayaw naman ni Conlu si Causing nga nagahimo sang ensakto para sa kaayuhan sang kadam-an kag wala nagapa-intimidate,

Sa panaysayon sang traffic enforcer, nagapamilit gid ang driver sang armored car nga magsulod bisan gutok ang trapiko. Sa baylo nga magpati sa iya nga mag-U turn sa unhan, ginpahayag nga ginkasahan siya  sang pusil, ginpakitaan sang dirty finger kag ginbuyayaw. (AGB)