Kanyon sang pusil sang mga pulis, indi pagbutangan sang tape sa New Year celebration–PRO 6 spokesperson

Indi na magpatuman sang muzzle taping sa mga pusil ang Philippine National Police. Suno kay Police Regional Office 6 Spokesperson PSUPT Gilbert Gorero, ikaduha na ini nga tuig nga indi pagbutangan sang tape ang kanyon sang mga pusil base man sa mandu ni PNP Chief Director General Ronald Dela Rosa.

Sa baylo nga muzzle taping, magahimo sang inspection ang mga unit commanders sa mga issued firearms agud mahibaluan kon nakapalupok sang pusil ang pulis.

Para kay Gorero, insulto man sa kapulisan nga butangan sang tape ang kanyon sang ila mga pusil bangud nagapakita nga wala sang salig sa ila ang pamunuan sang PNP. Apang panghangkat naman sa mga pulis ang indi pagbutang sang tape nga indi magpadala-dala sa ila balatyagon samtang nagasug-alaw sang bag-ong tuig.

Ginkalipay sang PRO 6 nga wala sang may narecord nga indiscriminate firing sang pagselebrar sang paskuwa. (AGB)