Lima ka job hires sa syudad, napahalin kasunod sang reklamo nga ginpa-agi sa Customer Care Center sa City Hall

Iloilo City–Lima na ka empleyado ang napahalin sa City government bangud sa mga reklamo nga ginpalab-ot paagi sa Customer Care Center sa City Hall halin sang nagligad nga tuig.

Suno kay Mrs. Eireen Manikan, executive director sang Customer Care Center, lunsay mga job hires ang ginpangkakas sa serbisyo matapos napamatud-an ang ila violations. Ginpahayag ni Manikan nga gina-evaluate kag gina-validate sang maayo sang CCC ang mga reklamo.

Sa record sang CCC, naglab-ot na sa 98 ka mga reklamo ang ila nabaton halin Enero tubtub sa ikaduha nga semana sang Disyembre subong nga tuig. Kon may complaint form, may compliment form man ang CCC suno kay Manikan agud kilalahon ang maayo nga mga empleyado.

Sa masunod nga tuig, ginpahayag ni Manikan nga plano nila magbutang sang textline agud maka-akomodar sang mas madamo nga reklamo magluwas pa sa landline, email kag walk-in. Nagalaum si Manikan nga mangin aware ang publiko nga may madangpan sila sang ila mga reklamo batuk sa indi maayo nga mga empleyado sang City government. (AGB)