12-Anyos Nga Bata Nga Babaye Nagreklamo Nga Ginpahug Kag Ginbastos Sang Babaye Kag Lalaki Nga Iya Naka-Chat Sa Facebook Messenger

Iloilo City – Nagdangup sa National Bureau of Investigation VI ang 12-anyos nga bata nga babaye matapos ginpahayag nga ginpahug kag ginbastos sang babaye kag lalaki nga iya naka-chat sa Facebook Messenger.

Nagahilibiun samtang ginsaysay ni alyas Lyca nga una nag-chat sa iya ang babaye nga may Facebook name Vercel Gallardo nga nagpamangkot kon nakita sini ang FB post sang isa ka Art John Rosal. Ginpahayag ni Lyca nga gin-engganyo siya ni Gallardo nga i-add si Rosal sa Facebook bangud may pictures siya sang bata nga hublas.

Suno kay Lyca, napilitan siya nga i-add si Rosal kag gin-ayo nga indi pagpalaptahon ang iya mga litrato.Pero ginmanduan siya sang lalaki nga kuhaan sang litrato ang iya lawas kag ipadala diri kabaylo sa pagdelete sang mga pictures.

Ginkulbaan si Lyca gani nga nanugid sa iya magulang nga babaye. Ginpanindugan ni Lyca nga wala siya sang nude pictures kag sang Mierkules sang gab-i niya lang nakilala ang mga suspek.

Nagapati si Lyca nga gin-edit lang ang mga litrato. I-refer sang mga imbestigador sa NBI regional director ang chat thread agud ma-verify ang FB accounts, matultulan kag madakpan ang mga suspek.

(ATT)