80-anyos nga driver sa Jaro, inspirasyon sa pagtrabaho

Iloilo City–Inspirasyon sa tanan ang pagpangabudlay ni Mr. Juanito Cabillon sang Simon Ledesma, Jaro nga sa 80-anyos nga edad, todo sa pagtrabaho para sa iya pamilya kag may balatian nga asawa paagi sa pag-maneho sang depasahero nga jeep.

Suno kay Cabillon, wala siya sang iban nga saligan kag iban nga palangabuhian kondi ang mag-drive sang depasahero nga salakyan.

Nagakita sang 500 tubtub 800 pesos si Cabillon kada adlaw nga iya ginabakal sang bulong sang iya asawa kag iban nila nga kinahanglanon.

Sa apat ka kabataan ni Cabillon, duha na lang ang nabilin nga may mga trabaho kag pamilya na. Nagapasalamat naman si Cabillon nga sa iya edad, mapagsik pa siya kag masanag pa ang iya panan-awan para nga makatrabaho.

May mga netizens nga naghatag sang bulig kay Cabillon matapos nakita ang iya video sa Aksyon Radyo Iloilo. (AGB)