PECO, naghingyo nga likawan ang pagpalupok sa idalum sang ila mga linya

Iloilo City–Ginpanugyanan ni Engr. Randy Pastolero sang Panay Electric Company ang publiko nga likawan ang pagpalupok ilabe na sa idalum sang ila mga linya agud malikawan ang brownout sa bag-ong tuig.

Suno kay Pastolero, daku ang posibilidad sang brownout kun maigo ang ila mga linya ilabe na ang ginakabig sini pinaka-kritikal nga 69kv line nga kun maigo, magaresulta gid sa total blackout sa siyudad. Ini suno sa iya ang naga-connect sang mga substations sa planta.

Nagnubo suno kay Pastolero ang risgo sa brownout bangud sa ginapatuman nga regulasyon sang gobyerno sa palupok subong nga New Year revelry.

2007 sang nagluntad ang pagligum-dulom sang bug-os nga siyudad sa new year matapos naigo ang linya sang PECO sa Baldoza, Lapaz. (AGB)