House Bill 6776 nga nagatuyo magtingub sang LTO kag LTFRB, bentaha sa publiko suno kay LTO 6 ARD Atty. Gaudioso Geduspan

Iloilo City–Bentaha ang dala sang House Bill 6776 ukon ang “Land Transport Act of 2017,” nga ginfile sang Disyembre, 2017 ni House Speaker Pantaleon Alvarez kag walo pa ka mamalidha. Tuyo sini nga tingbon ang Land Transportation Office (LTO) kag Land Transportation Franchising and Regulatory Board (LTFRB) kag himuon nga Land Transportation Agency.

Suno kay LTO 6 Assistant Regional Director Atty. Gaudioso Geduspan, malikawan ang pagsalangisag sang publiko sa function sang duha ka opisina kon tingbon sila. Ginpahayag ni Geduspan nga mas mapadasig ang mga pagproseso kag malikawan ang mga huol.

Nakita man ni Geduspan nga mapaayo pa gid ang serbisyo bangud mahapos na nga madakpan ang maghimo sang indi ensakto.

Malawig pa man ang proseso agud matingub ang LTO kag LTFRB suno kay Geduspan apang nagalaum siya nga mangin madinalag-on kon mangin laye na ang House Bill 6776. (AGB)