Isa patay, isa pilason sa pagbun-anay sa Jaro

Iloilo City–Isa ang patay kag isa ang pilason sa pagbun-anay sang magka-upod sa trabaho sa Barangay Cuartero, Jaro kagab-i.

Sa imbestigasyon sang Jaro police, upod nga naga-inom inom ang magka-trabaho nga sanday Benjie Beatingo, 48-anyos sang Ajuy, kag Mike Tapel, 20-anyos sang Bitoon Ilaya, Cuartero, Capiz sang gulpi lang nagbaisay.

Naglikaw na si Tapel kag nagsulod sa iya kuwarto apang ginpahayag nga ginsunod ni Beatingo kag ginhandus sang kutsilyo. Nagpukutay ang duha tubtub nga naagaw ni Tapel ang kutsilyo kag ginbuno sang makapila ka beses si Beatingo.

Gindala pa sa WVSU Medical Center si Beatingo apang gindeklarar nga napatay. Napilasan man si Tapel apang nakaguwa sa ospital matapos nga nabulong kag yara na sa kustodiya sang Jaro police. Ginrason ni Tapel nga self-defense ang iya ginhimo. (AGB)