“VANISHING MANSION” signage kag “WHITE LADY PASSENGER” statue, agaw-atensyon sa atubang sang Guimbal National High School

Guimbal, Iloilo — Agaw-atensyon ang ginpahayag “vanishing mansion” kag “white lady passenger” kon maglabay sa karsada sa atubang sang Guimbal National High School. Halin sa syudad, may mga paandam nga makita pila ka metro ang kalayuon antes ang masobra 100-anyos nga puno sang Acacia sa diin ginapatihan nahamtang ang “vanishing mansion.” May estatwa man sang “white lady passenger” nga makita malapit sa puno nga daw nagapara sang salakyan. Ginpahayag ni Guimbal Mayor Oscar ‘Oca’ Garin nga ang mga signages kag rebulto, kabahin sang iya programa sa pagprotekta kag pagpreserba sa century old tree. Bisan may road widening sa lugar, nadesisyunan suno kay Mayor Garin nga indi pag-utdon ang puno kag ikordon ini agud indi mabungguan sang mga salakyan. Nag-ugat ang “vanishing mansion” kag “white lady passenger” suno kay Mayor Garin sa pahayag sang taxi driver nga nagdul-ong sang iya pasahero sa Guimbal sang nagligad nga tuig. Ginpahayag gindul-ong sang taxi driver ang babaye nga nakasuksok sang lunsay puti nga bayo sa mansion sa atubang sang dako nga Acacia tree. Sang nagpamangkot ang taxi driver sa mga pumuluyo sa lugar may kaaangtanan sa mansion, naglibog ang ulo sang driver bangud ginpahayag sang iya napamangkutan nga wala sang mansion sa atubang sang daku nga puno sang Acacia. Nakibot ang taxi driver bangud wala naman ang mansion sang iya ginbalikan. Antes ang insidente, madamo na sang nagpahayag suno kay Mayor Garin nga nakita man nila ang mansion ukon ang babaye nga may suksok puti nga bayo sa lugar. Ginpa-athag ni Mayor Garin nga ang mayor nga katuyuan sang programa amu ang pagprotekta kag pagpreserba sa puno sang Acacia, matuod man ukon istorya lang ang “vanishing mansion” kag “white lady passenger.” Ginpabutyag naman sang alkalde nga wala siya sang labot sa mga kritiko nga nagapati nga wala na siya sa insakto nga paminsaron sa pagpati sa mga “engkanto.” Magluwas sa “vanishing mansion” kag “white lady passenger,” agaw atensyon man maglabay sa Guimbal ang uniform nga gate sang mga pamalay sa higad sang karsada. Human sa salsalon ang gate kag may disenyo nga kasubong sa silak sang adlaw. 97% suno kay Mayor Garin sang mga tag-iya sang pamalay kag establishmento nga apektado sang proyekto ang nagpasugot sa amu nga lihok. (JoMaque)