Jaro ABC President, nagpa-athag kon ngaa nagpasugot nga magbaligya ang mga kiosko sa dalan sa guwa sang Jaro Plaza

Iloilo City–Gintudlo ni Jaro ABC President Leo Lindero ang Committee on Events nga gintukod ni Mayor Joe Espinosa nga nagpresentar sang ideya nga okuparon ang tunga sang karsada agud patindugan sang mga kiosko para sa Jaro Agro-Industrial and Charity Fair.

Suno kay Lindero, may plano nga ginhatag sa ila ang Committee on Events apang wala naathagan kon anu kadako ang mga kiosko.      Ginmatu-matuhan na lang suno sa iya sang Jaro ABC ang pagtakos sang kada kiosko nga mag-okupar sa duha ka lanes sang karsada sa guwa sang Jaro Plaza.

Ginpalab-ot man ni Lindero kay Mayor Espinosa ang concern niya sa trapiko bangud sa pagbutang sang mga kiosko apang ginpasalig siya sang alkalde nga ini ang bahala paagi sa Public Safety and Transportation Management Office ukon PSTMO.

Kon si Lindero ang masunod, indi siya magpasugot nga sa guwa sang Jaro Plaza ibutang ang mga kiosko apang indi siya makapamalibad sa luyag sang alkalde.

Sa Executive Order Number 2 series of 2018 nga gin-issue ni Mayor Espinosa, gin-authorize sini ang Jaro ABC nga magbutang sang kiosko sa portion sang Rizal Street sa guwa sang Jaro Plaza. (AGB)