Video sang mga estudyante sa San Gregorio Lambunao nga nagatabok sa suba pakadtu sa eskuwelahan, nag-trending sa social media

Lambunao, Iloilo — Nagasakripisyo sa pagtabok sa suba kada adlaw ang mga estudyante kag pila ka manunudlo sang San Gregorio Elementary School sa Lambunao para makakadto sa eskwelahan. Sa Facebook post ni Joycel Lastimoso Moquite, duha ka tuig na nga manunudlo sa amo nga eskwelahan, ginpahayag sini nga kinahanglan nila maglusong sa tubig agud makakadto sa San Gregorio halin sa iban nga barangay. Suno sa iya kinahanglan nila magbalon sang extra nga bayo bangud indi malikawan nga maglusong sila sa tubig. Ang malain pa suno sa iya bangud kun kaisa nagalab-ut sa tag-apat ka oras ukon masobra pa ang paghulat nila nga magpanaug ang tubig antes sila makatabok. May tiun suno sa iya nga nagakagab-ihan sila sa pagpauli kapin pa kun taub ang tubig sa suba. May tiun suno sa iya nga taga-leog ukon lapaw pa sa ulo ang tubig kabangdanan delikado para sa mga nagatabok. Dugang niya may taytay man nga madugay na ginsuguran pero nauntat ang pag-obra kabangdanan indi nila maggamit. Nagalaum sila nga mabutangan bisan hanging bridge ang suba para indi sila mabudlayan. Ang San Gregorio nagadistansiya sang ginabanta sa 15 kilometros halin sa town proper. Sa post ni Moquite, makita nga ginpaagi na lang sang estudyante sa kadlaw ang ila sitwasyon kada adlaw paagi sa “pagreport” samtang naga-uyat sang gamay nga plastic bottle sang softdrink nga ginhimo sini mikropono. Sa likod sang “nagareport” makita ang pagtabok sang mga estudyante sa suba. (JoMaque)