Hanging bridge nga ipatindog sa suba sa San Gregorio, Lambunao, may pondo na suno sa barangay kapitan

Lambunao, Iloilo–Nagahulat sang pundo halin sa KALAHI CIDSS ang Barangay San Gregorio para sa pagpakay-o sang taytay sa suba.

Kasunod ini sang nag-viral nga video sang estudyante nga nagareport angut sa ila problema sa pagtabok sa suba pakadtu sa Caninguan National High School kada adlaw. Suno kay Punong Bararangay Jose Glenn Lasado sang San Gregorio, madugay na ang problema antes pa ginpatindog ang eskwelahan walo ka tuig na ang nakaligad.

Ginapabuligan na lang ni Lasado sa iya mga tanod ang pagtabok sang mga estudyante ilabe na kon mag-ulan. May yara suno sa iya sang steel bridge nga nasuguran na obra apang wala nahuman.

Sa nagviral nga video nga gin-post ni Joycel Lastimosa Moquite, duha ka tuig nga manunudlo, makita ang estudyante nga nagareport samtang nagatabok sa suba ang iya mga kaupod. Naga-apelar ang estudyante sang bulig sa ila sitwasyon. Nagalaum ang mga ini nga mabutangan bisan hanging bridge ang suba agud indi na sila maglusong sa tubig. (AGB)