PSTMO Head Jeck Conlu, may pag-athag sa mga traffic violators

Iloilo City–Temporaryo lang nga indi magakumpiskar sang drivers license sang traffic violators sa syudad ang mga traffic aides.

Ini ang gin-athag ni Public Safety and Transportation Management Office ukon PSTMO Head Jeck Conlu kasunod sang naguwa nga impormasyon nga indi na sila mangkumpiskar sang drivers license umpisa subong nga semana. Suno kay Conlu, indi maka-issue sang temporary operators permit ukon TOP ang mga traffic aides bangud wala pa nakapa-print. Ini bangud ginsaylo ang printing sang TOP sa National Printing Office kag wala pa naka-abot ang bag-o nga kopya nga may security features.

Gin-ako naman ni Iloilo City Loop alliance of Jeepney Owners and Drivers Association President Boyet Parcon nga wala lang sila nag-intiendihanay ni Conlu bangud indi kompleto suno sa iya ang ginhatag nga impormasyon.

Ginpahayag ni Conlu nga nalakip sa ila gin-istoryahan sang damlag lang ni Parcon ang pagpatuman sang long term program pagkatapos sang Dinagyang Festival kag Jaro Fiesta. Nalakip sa istoryahanay ang pagtuon kon paanu mapatuman ang pagdakup sa mga drivers nga indi pagkuhaon ang ila lisensya. (AGB)