Duha ka mayors sa Western Visayas, indi makatambung sa meeting nga ginpatawag ni Presidente Rodrigo Duterte

Duha ka mayors halin sa western visayas ang indi makatambong sa sinapol nga ginpatawag ni Presidente Rodrigo Duterte sa Pebrero 12 sa Cebu.

Suno kay DILG 6 Director Anthony Nuyda, nagtakop kahapon ang deadline kag wala nakahatag sang confirmation sa meeting ang alkalde sang Pan-ay kag Ivisan sa Capiz bangud sang medical reasons. Una na nagguwa ang impormasyon nga indi makatambong sanday Guimbal Mayor Oscar Garin kag Lambunao Mayor Jason Gonzales pero sa pinaka-ulihi nga impormasyon ni Nuyda, nagkumpirmar na ang mga ini nga ma-attend sa meeting.

Ginpahayag naman ni Nuyda nga wala sila nakahibalo sang agenda sa meeting.

Ang DILG lang suno sa iya ang naga-imbitar kag nagapahibalo sa mga alkalde. lakip sa mga gin-imbitar nga matambong sa meeting ang mga governors kag city kag municipal mayors sa Visayas kag Mindanao. (AGB)