Suspect sa pagpatay sa 11 anyos nga bata sa Leganes nga una ginreport naghikog, napasakaan na sang kaso

Leganes, Iloilo — Ginkunfirma sang hepe sang Leganes Police Station nga napasakaan na sang murder ang suspect sa pagpatay sa 11-anyos nga bata sang Oktubre, 2017. Suno kay Senior Inspector Dadje De Lima, ang suspect ang himata sang biktima nga si alyas Toto.
Base sa imbestigasyon sang pulis, ginpaandaman sang suspect ang biktima angut sa pagkadula sang iya mga hinuptanan antes natabo ang krimen. May witness naman nga nakakita nga nagkadto ang suspect sa balay sang biktima antes siya nasapwan nga nagabitay. Ginpahayag naman sang amay ni Toto nga wala sang kaangtanan ang iya bata sa nagkaladula nga hinuptanan sang suspect. Wala nakahibalo ang amay kun ano ang motibo sang suspect sa pagpatay sa iya bata. Ginpahayag wala sila sang daan nga hiligutanon sang suspect suno sa amay.Ginahulat na lang sang pulis nga mapapanaugan sang subpoena sang korte ang suspect agud makuhaan sang bahin angut sa insidente.  (JoMaque)