(UPDATE) Eireen Mae Tatad, kumpirmado nga nakuha sang NBI agents sa Janiuay

Janiuay, Iloilo–Ginkumpirmar ni Senior Inspector John Paul Guay, hepe sang Janiuay Municipal Police Station, nga ginkuha sang National Bureau of Investigation agents sa Brgy. Madong, Janiuay si Eirene Mae Agustino Tatad, 31, residente sang Villa Corazon, Antipolo City kag ginpahayag consignee sang P6.4 billion nga balor sang shabu nga ginpalusot halin sa China sang May, 2017.

Suno kay Guay, ginkuha si Eireen Mae sa balay sang iya tiya sang Pebrero 2. Ginsaysay sang tiya nga Enero 27 sang nag-abot si Eirene Mae sa Iloilo sakay sa RORO vessel agud magbisita sa iya mga himata sa Madong, Janiuay kag Binabaan, Lambunao kag gusto man magsaksi sang Dinagyang Festival. Suno pa kay Guay, naglagaw pa ini sa Smallville upod sa iya mga pakaisa.

Upod sang duha ka NBI agents ang utod ni Eirene Mae nga si Jun Tatad sang nag-abot sa Madong las-8 sang aga sang Pebrero 2 kag nagdiretso sa Iloilo Airport alas 8:30 sang aga. Gin-aresto si Eirene Mae bangud may warrant of arrest nga gin-issue batok sa iya angut sa drug smuggling.

Ginpahayag ni Guay nga wala nagreport gilayon ang mga himata sa Janiuay police station sa pagpati nga “in good faith” man ang pagkuha kay Eirene Mae bangud upod man ang utod sini.

Alas 4:30 kahapon sang hapon na lang nagpadulong sa police station ang tiya ni Eirene Mae agud magpahibalo sang natabu.

Ginpahayag nga wala nag-coordinate ang NBI Central Office sa Police Regional Office 6, Iloilo Police Provincial Office, Janiuay Police Station kag bisan sa mga barangay officials sa ila pag-aresto kay Tatad. (AGB)