Duha ka 15-anyos, gintudlo nga nagpanghaboy sang bato sa Molo
Iloilo City–Narescue ang duha ka 15-anyos nga solterito sa Brgy. San Juan, Molo nga gintudlo nagpanghaboy sang bato sa 2nd street, Juntado Subdivision sa Calumpang, Molo.
Suno kay San Juan, Molo Punong Barangay Juanito Enojado, narescue ang duha ka menor sang mga barangay tanod sang duha ka barangay kagab-i.
Ginpahayag sang mga menor suno kay Enojado nga may mga pamatan-on sa Calumpang nga una nagpanghaboy sang botelya sa ila. Ginpahayag naman sang mga ginikanan sang mga menor nga nagatulog sang temprano ang ila kabataan apang nagaguwa sa ila balay nga lipod sa ila ihibalo.
Nagpasalig sanday Enojado kag Calumpang, Molo Punong Barangay Roberto Niño nga padayon ang ila pagbantay sa ila nasakupan ilabi sa implementasyon sang Curfew for Minors Ordinance agud malikawan nga masulit ang kasubong nga insidente.
Una na nagreklamo ang mga pumuluyo sa 2nd Street, Juntado Subdivision nga makapila ka beses na nga nagapanghaboy sang botelya kag nagapalupok man sang pusil ang mga pamatan-on sa ila lugar. (AGB)