NEDA 6 Director Ro-ann Bacal, nagpaathag kon paano gin-compute ang suhestyun nga P8 nga regular fare sa mga jeep

Iloilo City — Nag-agi sa scientific calculation ang P8 nga regular fare nga suhestyun sang NEDA. Suno kay Director Ro-Ann Bacal, nagakaigo na ang P1.50 nga dugang sa saka sa pletehan sang depasahero nga jeep. Ginbase suno sa iya ang scientific calculation sa presyo sang mga nagapanguna nga produkto, inflation rate kag epekto sang Tax Reform for Acceleration and Inclusion ukon TRAIN Law. Pa-athag ni Bacal, may ripple effect ang pagmahal sang pletehan bangud magamahal man ang mga balaklon kag iban pa nga serbisyo. Ginpahayag pa ni Bacal nga indi lang mga drivers kag operators ang ginkonsiderar nila sa ginpaguwa nga computation kundi lakip ang iban pa nga sektor pareho sang mga vendors, iban pa nga mga negosyante kag bisan mga estudyante nga ma-apektuhan kon magsaka ang pletehan. Apang gin-athag ni Bacal nga opinion lang ang ila ginpadala sa LTFRB kag nakadepende gihapon sa Board ang pag-aprubar sa P10 nga ginahingyo sang mga transport groups sa Iloilo. Nagpasalig naman si ICLAJODA President Raymundo Parcon nga balikan sang mas maayo nga serbisyo ang mga pasahero kon pasugtan ang ila petition. (JoMaque)