OFW nga nasapwan sa sulod sang freezer sa Kuwait, tumandok sang Iloilo
Iloilo — Mabuot nga bata kag luyag lang nga magbulig sa iya pamilya si Joanna Demafelis, ang OFW nga nasapwan sa sulod sang freezer sa Kuwait nga tumandok sang Sitio Cordero Barangay Ferraris, Sara. Suno sa tiyo nga si Ferraris Barangay Kagawad Pablo Demafelis, nagpa-Manila si Joanna pagkatapos nga nagradwar sa Sara National High School kag nagtrabaho sa sulod sang balay. Apang sang May, 2014 naglakat siya pa-Kuwait agud nga makabulig sa iya pamilya. Nakatawag pa ini sa iya tiyo kag nakapangumusta sa ila pamilya sa una nga tatlo ka bulan niya sa Kuwait apang wala na nasundan. Ginpahayag nga 2016 sang nakapanawag si Joanna sa iya utod sa Manila nga si Juliet kag nagpahibalo nga ma-extend siya sang iya kontrata sang isa ka tuig. Apang wala na naka-contact si Joanna gani nagpangayo sang bulig si Juliet sa OWWA sang Pebrero 2017. Sa pagpadulong sang OWWA representative sa Sara kaina, ginpahayag nga ginfollow-up man nila ang reklamo sang pamilya apang indi na ma-contact ang agency nga nagpadala sa iya sa Kuwait bangud nagsirado na. Si Joanna ang nagapa-eskwela sang iya manghod sa kurso nga Criminology apang nag-untat ang manghod bangud masobra isa ka tuig na nga wala nakapadala sang kuwarta ang biktima. Nagatrabaho sa kampo ang iloy ni Joanna samtang wala sang trabaho ang iya nagabalatian nga amay matapos nga ginprenda ang ila uma.
Abagahon naman sang gobyerno ang gasto sa pagpabalik sang bangkay ni Joanna sa Pilipinas. Suno kay Mr. Jack Arroyo, PIO sang OWWA sa Iloilo, nakakadto na sila sa pamilya ni Joanna Sara kaina kasunod sang instruction halin sa ila central office. Na-identify na si Joanna suno kay Arroyo apang ginahulat pa sang OWWA ang official report sang mga pulis sa Kuwait. Natalana man i-autopsy ang bangkay sang OFW. Kon valid pa ang membership ni Joanna sa OWWA, may batunon nga insurance, burial kag livelihood assistance ang iya pamilya. Ang gobyerno man suno kay Arroyo ang magasto kon magpasaka na sang kaso.
Natukiban ang bangkay ni Joanna matapos ginsulod sang tag-iya ang apartment bangud isa ka tuig na nga wala nakabayad sa renta ang amo sang biktima nga Lebanese. Nakita ang bangkay nga nagasikuku sa sulod sang freezer nga 4feetx4feet ang kadakuon. Gin-confirm sang tiyo sang biktima nga si Barangay Kagawad Pablo Demafelis nga wala sang pang-ibabaw nga panapton ang iya hinablos. (JoMaque)