Tatlo ka cellphones, na-recover sa greyhound operation sa BJMP Ungka

Iloilo City–Tatlo ka mga cellphones ang narecover sa ginhimo nga greyhound operation sang BJMP personnel upod ang mga pulis kag PDEA operatives sa BJMP Ungka kaina sang aga.

Suno kay BJMP 6 Assistant Regional Director for Administration and Operation Jail Supt. Gilbert Peremne, ang duha ka cellphones natukiban nga ginlubong sa madamol nga tsinelas nga nakuha sa CR sang cell number 2 kag 3. Isa pa ka cellphone ang nakuha nga nakalubong sa tsinelas nga ginasuksok sang inmate nga si alyas Jay.

Imbestigaran naman sang BJMP 6 kon paanu naman nakasulod ang cellphones sa pihak sang istrikto nga pag-inspeksyon.

May impormasyon si Peremne nga nakasulod ang cellphone bangud ginapatihan nga ginatago sang mga dalaw nga babaye sa ila kinatawo.

Ginakonsiderar na sang BJMP nga mag-search pati sa mga pribado nga parte sang lawas sang mga dalaw nga babaye kon magapadayon ang pagsulod sang mga cellphones sa jail facility. (AGB)