Pamilya sang Ilongga OFW nga nasapwan sa sulod sang freezer sa Kuwait, nagapangayo sang hustisya sa natabu sa ila himata

Sara, Iloilo — Naga-apelar sa gobierno ang pamilya ni Joanna Demafelis nga hatagan sang hustisya ang kamatayon sang ila himata matapos ini nasapwan nga nagabarikutot sa sulod sang freezer sa isa ka abandonado nga apartment sa Kuwait. Suno sa iloy nga si Mrs. Eva Demafelis sang Brgy. Ferraris, Sara, wala gid siya naglaum sa nadangatan ni Joanna sa first time sini nga pagtrabaho sa iban nga pungsod. Nagalaum ang iloy nga mabuligan sila sang gobierno sa tanan nga gasto sa pagpapuli sa bangkay kag pagpalubong sa iya bata.Gin-ako sang iloy nga una kag ulihi niya nga naistorya si Joanna sang paglakat niya sa Kuwait apang masami ini nga nagacontact sa iya mga utod. Ginpahayag sang iloy nga wala gid nakasugid ang iya anak nga may problema siya sa iya amo. (JoMaque)