Ikaduha nga suspect sa brutal nga pagpatay kay Ilongga OFW Joanna Demafelis, nadakpan na

Manila —  Nadakpan ang ikaduha nga suspek sa brutal nga pagpatay kay Ilongga OFW Joanna Demafelis nga tumandok sang Barangay Ferraris, Sara.

Base sa press release sa website sang Department of Foreign Affairs,  yara na sa kustodiya sang mga otoridad sa Damascus, Syria si Mona Hassoun. Una nga nabalita sang Biernes ang pagkadakup sa bana sini nga si Nader Essam Assaf nga yara sa custody sang Lebanese authorities.

Ginpasalig ni Foreign Affairs Secretary Alan Peter Cayetano nga bisan nadakpan ang mag-asawa, indi mag-untat ang gobyerno sa pagfollow-up base man sa mandu ni Presidente Rodrigo Duterte agud nga mahatagan sang hustisya ang natabu kay Demafelis nasapwan sa sulod sang freezer sa Kuwait.

Ginalauman nga marequest ang Kuwaiti authorities sa pag-extradite kay Assaf halin sa Lebanon agud maatubang sini ang kaso batuk sa iya sa Kuwait.

Sa pagbisita ni Presidente Duterte sa Sara sang nagligad nga semana, ginpasalig sini sa pamilya Demafelis nga himuon ang tanan agud madasig nga mahatagan sang hustisya ang OFW.  (JoMaque)