Isa pa ka Ilongga OFW, narescue na halin sa iya amo nga ginpahayag nagasakit sa iya sa Kuwait
Iloilo–(EXCLUSIVE) Narescue na kag yara na sa Philippine Overseas Labor Office (POLO) sa Kuwait ang isa pa gid ka Ilongga OFW nga nagreklamo ginpagutman kag ginasakit sang iya Lebanese nga amo.
Suno kay Elma Dianson, iloy ni Julie Ann Dianson-Dolar, tumandok sang Brgy. Daan Banwa, Estancia, nga nagpahibalo na ang iya pakaisa nga yara man sa Kuwait nga yara na sa pag-inakop sang POLO si Julie Ann.
Una dire, ginpahayag sang utod ni Julie Ann nga si Mary Rose Villariez nga nagapalangluya na ang iya utod bangud wala na ini ginapakaon sang iya amo. Nagpangayo man ini sang bulig nga ma-rescue siya bangud indi na siya maka-agwanta.
Ginasakit man ini sang iya amo bisan diutay lang ang iya sala.
Marso 2016 sang nagkadtu sa Kuwait si Julie Ann kag magatapos na kuntani ang iya kontrata sa Mayo subong nga tuig.
Nagalaum ang pamilya nga makapauli gilayon si Julie Ann. (JoMaque)