Linibo ka mga pumuluyo, nagdugok sa lubong ni OFW Joanna Demafelis
Sara, Iloilo — Linibo ang nagtambong sa lubong ni Joanna Demafelis, ang OFW nga ginpatay kag ginsulod sa freezer sa kuwait, kahapon sang hapon.
Ginhiwat ang misa sa St. John the Baptist Church sa Sara kag ginpangunahan ni archbishop Angel Lagdameo.
Magluwas sa pamilya, nagtambong man sa lubong ang mga malayo nga himata ni Joanna, mga abyan, classmates kag iban nga pumuluyo sa kaiping nga kabanwahanan.
Suksok sang pamilya, mga abyan kag mga sympathizers ang puti nga t-shirt nga may ngalan nga ‘Justice for Joanna’.
Present ang pila ka mga local officials sa pagpanguna ni 5th district cong. Buboy Tupas kag mga government officials pareho nanday DOLE secretary Silvestre Bello III, OWWA administrator Hans Leo Cacdac kag pila ka mga regional officers.
Pagkatapos sang misa, ginhiwat ang public viewing sa bangkay ni Joanna antes ini gindul-ong sa Virgin Island Cemetery sa Brgy. San Antonio Yusay sa diin may ginhimo man nga public viewing.
Ang kamatayon ni Joanna sa nahibaluan amu ang nagtulod kay presidente Rodrigo Duterte nga magpatuman sang deployment ban sang mga OFWs sa Kuwait kag pag-repatriate sang mga OFWs sa nasambit nga pungsod. (JoMaque)