Mga tinawo ni Congressman Jerry Treñas sa City Hall, ginapa-resign ni Mayor Joe Espinosa
Iloilo City–Ginkumpirmar ni Executive Assistant for Barangay Affairs Boyet Rico nga gin-imbitar sila kahapon ni Mayor Joe Espinosa sa isa ka meeting kag ginparesign.
Suno kay Rico, las-4 sang hapon sang Marso 9 sang ginpatawag sila sa conference hall pero ang nag-atubang sa ila amo si Jojo Castro. Ginhambalan sila ni Castro nga “kun loyal kamo kay Espinosa, do not tender your resignation.” Pero nahibaluan man sang tanan suno kay Rico nga tinawo sila ni Treñas kag tampad sila sa kongresista. Aminado si Rico nga “indi na maayo” ukon lain na ang atmosphere sa city hall.
Ang pahayag ni Rico kasunod man sang nabalita nga liwat magakandidato sa pagka-alkalde si Treñas sa masunod nga eleksyon.
Sa Lunes pagkatapos sang flag ceremony, mapasa na sang ila resignation letter si Rico kag iban pa nga opisyal kay Espinosa kag magapanghimos sa ila opisina.
Ang pahayag ni Rico ginsegundahan man ni anay Jereos Lapaz Punong Barangay kag subong legislative staff Rudiver Junco. Suno kay Junco, maupod siya sa mga ma-resign matapos sila ginpapili.
Magluwas kanday Rico kag Junco, lakip man sa mga ginpatawag kahapon sanday Executive Assistants Melchor Tan nga anay city administrator sa panahon ni Treñas sang alkalde pa ini sang siyudad kag anay TMTRO OIC Nuens Mitch Antiqueña nga gin-reappoint bilang EA, Irene Ong kag Roy Firmeza sang ICUPAO.
Sanday Treñas kag Espinosa ang magbilas. (AGB)