Tigbauan police, may nakuha nga CCTV footage sang riding-in-tandem nga posible nagtiro kay STL Iloilo Province operator Sam Aguilar

Tigbauan, Iloilo–May na-capture sa CCTV camera sang isa ka balay sa Guimbal nga riding-in-tandem nga ginatudlo amo ang nagtiro sa salakyan ni STL-Iloilo province operator Sam Aguilar sa Brgy. Buyuan, Tigbauan kahapon.

Sa screen grab halin sa CCTV footage, nagasoksok sang itom nga jacket, itom nga pantalon, naka-bonnet kag naka-helmet ang driver sang motorsiklo samtang ang backrider, nagasoksok sang kolor de gatas nga jacket, faded maong pants kag naka-helmet nga may yellow combination. Ginbanta sang Tigbauan police sa 5’6 tubtub 5’7 ang height sang driver samtang 5’4 tubtub 5’6 naman ang height sang backrider. Natalupangdan man sang Tigbauan police nga may daw nagabukol sa likod sang backrider samtang wala sang plate number ang motorsiklo.

Ginpahayag sang Tigbauan police nga nagasantu sa description sang mga witnesses ang riding-in-tandem nga nakuhaan sang CCTV footage.

Plano sang police nga ipa-enhance ang footage.

Padayon nga ginabulong sa ospital sa syudad si Aguilar matapos na-operahan bangud sang anum ka pilas sa wala nga kilid kag likod. (AGB)