DOT 6 Director Helen Catalbas, nag-athag nga wala sang physical closure sa Boracay; mga nagakontra sa rekomendasyon nga pasiraduhan ang isla, mas maayo nga maghipos suno kay Catalbas
Boracay, Aklan–Wala sang physical closure nga matabu sa Boracay Island. Ini ang ginpa-athag ni Department of Tourism (DOT) 6 Director Atty. Helen Catalbas sa rekomendasyon sang inter-agency task force nga siraduhan ang isla sang tubtob isa ka tuig.
Suno kay Catalbas, indi mang-padlock ang gobyerno sang mga establisemento kag wala man sang scenario nga mala-martial law sa Boracay kon madeklarar na ang state of calamity.
Paathag niya, kon makahimo sang deklarasyon ang Malacañang, sapulon ni Tourism Secretary Wanda Teo ang mga airlines kag cruiselines nga buhinan ang flights kag biyahe padulong sa isla tubtob nga magdyutay ang mga bisita kag lubos nga mawad-an sang kustomer ang mga establisemento nga nagalapas sa environmental laws.
Ginpasiguro man ni Catalbas nga may nahanda nga plano ang gobyerno para sa mga empleyado nga ma-apektuhan sang rehabilitasyon.
‘Maghipos na lang’
Mas maayo naman suno kay Catalbas nga maghipos na lang ang mga nagakontra sa rekomendasyon. Suno sa DOT 6 Director, nagapadugang lang sa problema ang mga ginahimo sang iban ilabe na ang Boracay Foundation, Inc. nga daw kasubong nga nanghangkat sang gobyerno matapos ginpahayag sang presidente kag SB Member sang Malay nga si Neneth Aguirre-Graf nga hambalan sini ang mga airlines kag cruiselines nga indi na magdala sang mga bisita sa isla.
Suno kay Catalbas, nalipat si Graf nga dapat isa man siya sa nagabato sa mga nagalapas sa environmental laws ilabe na nga siya man ang chairperson sang Committee on Tourism.
Wala napunggan ni Catalbas nga magpa-utwas sang kalain sang buot sa madugay na sini nga kampanya nga matinluan ang Boracay. Suno sa iya, madamo na nga presidente ang nag-agi pero ang subong lang nga administrasyon ang nagpanindugan agud ma-rehabilitate ang isla. Daw hari suno sa iya ang mga negosyante sa Boracay sadtu bangud wala nagakilala sa kasuguan. (AGB)