Ilonggo principal halin sa Lambunao, ginakabig gihapon nga winner sang mga Pinoy bisan wala nakuha ang grand prize sa $1-million Global Teacher Prize

Dubai, UAE–Napaslawan ang Ilonggo principal nga makuha ang grand prize sa 1-million dollar Global Teacher Prize sang Varkey Foundation apang ginakabig gihapon siya nga winner sang mga Pinoy.

Ginhiwat kahapon ang awarding ceremony sa Dubai, UAE nga gintambungan ni Dr. Jesus Insilada, principal sang Caninguan National High School sa Lambunao. Ang top 10 finalists, ginpili halin sa 30 mil ka nominations kag applications halin sa 173 ka pungsod.

Si Dr. Insilada ang tumandok sang Calinog kag miembro sang indigenous people nga Panay Bukidnon.

Ginduso ni Insilada ang culture-based teaching ukon ang pagtudlo sa mga estudyante sang mga leksyon nga pwede nila ma-angut sa adlaw-adlaw nga kabuhi. Sa interview sang Aksyon Radyo Iloilo, ginpahayag ni Insilada nga nabatyagan niya ang kakinahanglan nga buhion ang kultura sa iya mga leksyon. Para diri, mas mahapos madeterminar sang estudyante ang iya pala-abuton kon kilala niya ang iya kaugalingon.

Nagdaug si Andria Zafirakou, art teacher sa Alperton Community College sa Brent, London, nga daku ang nabulig agud masalbar ang madamo nga estudyante agud indi ang mga ini ma-recruit sang mga gangs. (AGB)