Mag-asawa, nagreklamo nga ginhatagan sang doktor sa sentro sang expired nga bulong
Jaro, Iloilo City — Nagdesisyon ang mag-asawa nga indi pagpa-inom sa 11-month old nga lapsag kag ihaboy na lang ang bulong nga ginhatag sa sentro sa Jaro nga ginreklamo expired na.
Suno kay alyas Juliet, 30- anyos, Marso 13 sang ginpakonsulta niya sa sentro ang iya baby bangud naga-ubo kag sip-on.
Nagpasalamat si Juliet sang ginhatagan sang libre nga bulong apang nakibot sang nakita nga sang Pebrero pa ini nag-expire.
Ginreklamo ni Juliet ang expired nga bulong apang ginpahayag sang nagaduty nga doktor nga mahimo pa ini mainom sa sulod sang tatlo ka bulan.
Nagalalain man si alyas Boyet, 33-anyos, sa natabo.
Dugang niya, nadulaan na siya sang kumpiyansa sa sentro bangud posible mabutang sa alang-alang ang ikaayong lawas sang iya baby.
Ginpahayag sang mag-asawa nga ginhatagan man sila sang expired nga bulong sang nagligad nga tuig. (JoMaque)