Ilongga OFW sa Kuwait nga ginapahog nga ibaligya sang iya employer, desidido nga magpauli sa Pilipinas bisan wala pa natapos ang iya kontrata
Kuwait — (UPDATE) Desidido nga magpauli sa pungsod ang 27-anyos nga Ilongga OFW sa Kuwait nga nagreklamo ginasakit kag ginapahog sang employer nga ibaligya sa Saudi Arabia.
Suno sa OFW nga si Hazel Bravo, tumandok sang Ajuy, ginahaboy siya kag ang Pinay man nga kaupod sang ila ginabantayan nga nagapang edarun 3 kag 7 ka tuig sang bangko, silhig , tsinelas kag iban pa.
May kahigayunan man suno kay Bravo nga ginalagas sila sang kutsilyo sang mga ginabantayan.
Una nagreklamo si Hazel paagi sa iya live-in partner nga si Emelson Beraye sang Brgy. Cruz, Barotac Nuevo nga ginapahog sila ibaligya kag ginasakit sang employer nga babaye bangud sang pagpangimon.
Dugang niya, wala sila ginahatagan sang day off kag ginalimitahan na man sa pagkaun.
Nagdangop na sa Overseas Workers Welfare Administration ukon OWWA VI si Beraye para gilayon nga makapauli sa pungsod ang live in partner.
Matapos sa Mayo ang 2-year contract ni Bravo. (JoMaque)