Overpass sa Bonifacio Drive, City Proper, i-demolish pagkatapos sang Semana Santa

Iloilo City — I-demolish ang overpass sa Bonifacio Drive, City Proper sa atubang sang Department of Tourism (DOT 6) pagkatapos sang Semana Santa.

Ginahulat na lang sang Commission on Audit ang assessment sang City Engineers kon pila ang gingasto sang city government sa pagpatindog sang overpass suno kay Provincial Administrator Raul Banias.

Nagpasalig ang City Engineer suno kay Banias nga makahatag sila sang estimate sa COA sa sulod sang duha ka semana.

Magluwas sa overpass, gub-on man ang building sang DOT 6 bangud sang himoon nga landscaping sa atubang sang provincial capitol.

Ang landscaping kabahin sang P200-million multi-parking building sang provincial government.

Magasaylo naman ang DOT 6 sa Casa Real de Iloilo ukon sa daan nga kapitolyo. (JoMaque)