(UPDATE) Suspek sa pagtiro patay sa barangay kapitan sa Calinog, nakilala nga NPA member suno sa IPPO

IPPO Headquarters, Sta. Barbara, Iloilo–Nakilala na sang Iloilo Police Provincial Office ang matuod nga pangalan sang suspek sa pagtiro patay kay Punong Barangay Eustaquio Porras sang Lonoy, Calinog kahapon.

Suno kay IPPO Director PSSUPT Marlon Tayaba, na-identify ang suspek kay Ronald Llupar alyas Ka Isidro, 34 sang Bag-ong Barrio, Tapaz, Capiz nga vice commanding officer sa Central Front Committee sang NPA.

Si Llupar suno kay Tayaba, may warrants of arrest sa kaso nga rebelyon kag murder samtang ginapangita pa sang police ang warrant of arrest sa kaso nga arson.

Sa pag-interview kay Llupar, ginsugid sini nga may nagcontact sa ila nga bana sang karelasyon ni PB Porras apang wala sini ginhingadlan.

Si Llupar ang naka-hospital arrest matapos napilasan man sang nakabalos palupok si Porras. Una pa sini gindala nga pangalan ang Vincent Paduga apang natukiban nga fictitious name lang.

Padayon ang follow-up operation sang IPPO sa kaupod ni Llupar nga ginpahayag kaupod man lang sini sa hublag. (AGB)