(UPDATE) OFW nga taga-Estancia nga nagreklamo batuk sa iya amo sa Kuwait, nakapauli na sa iya pamilya

Estancia, Iloilo–Nakapauli na sa iya pamilya si Julie Ann Dianson-Dolar, ang OFW sa Kuwait nga tumandok sang Brgy. Daan Banwa, Estancia nga nagreklamo nga ginpagutman kag ginsakit sang iya amo nga Lebanese.

Alas 6:30 kaina sang aga sang naghugpa sa Roxas City Airport ang ginasakyan nga eroplano ni Dolar.

Tuman ang kalipay ni Julie Ann nga nakapauli nga buhi. Nagpasalamat man ini sa bulig nanday 5th District of Iloilo Cong. Raul Tupas, Estancia SB Member Danilo Bataga kag former Estancia Vice Mayor Butching Aclaro.

Narescue sang Philippine Overseas Labor Office si Julie Ann matapos nagpangayo sang bulig bangud indi na maka-agwanta sa ginahimo sang iya amo.

Marso 2016 sang nagkadtu sa Kuwait si Julie Ann kag magatapos kuntani ang iya kontrata sa Mayo subong nga tuig. (AGB)