Mga Local Kag Foreign Tourists Dumili-an Nga Magsulod Sa Boracay Sugod Sa Abril 26

Aklan –Dumilian ang pagsulod sang local kag foreign tourists sa Boracay sugod Abril 26.

Pahayag ini ni Department of Tourism Assistant Secretary Ricky Alegre sa pag-implementar sang anum ka bulan nga closure sang Boracay sa negosyo sang turismo. Gin-athag ni Alegre nga ang mga residente lang sang isla ang may unlimited access sa lugar. Usisaun naman sang maayo ang iban pa nga magabiyahe kag kon mapamatud-an nga turista, indi sila pagpasugtan nga makakadto sa Boracay.

Gin-aprubahan ni Presidente Rodrigo Duterte ang rekomendasyon sang inter-agency task force nga pagsiradu sang Boracay agud matinluan kag marehabilitate ang isla kag mabalik ang daan nga katahum. Ginpahayag ni Alegre nga kon magbuligay ang tanan kag matapos ang obra sang mas temprano, indi naman kinahanglan nga tapuson gid ang anum ka bulan kag liwat nga buksan sa mga turista ang ginakabig isa sa pinakamatahum nga isla sa kalibutan.

(ATT)