Lima ka bulto sang suspected shabu, na-intercept sang PDEA operatives sa RORO bus
Iloilo City–Lima ka bulto sang suspected shabu ang na-intercept sang Philippine Drug Enforcement Agency 6 operatives sa Ro-Ro bus sa Ceres Terminal nga halin sa Manila.
Suno sa PDEA agent nga na-interview sang Aksyon Radyo, nakabaton sila sang intelligence report nga may shipment sang shabu halin Manila nga ibagsak sa Iloilo kabangdanan ila gin-operate sa Ceres terminal sa Buhang, Jaro. Ginpahayag ginpadala lang sa konduktor ang suspected drugs nga nasulod sa pula nga paper bag upod ang isa ka lotion kag habon.
Ginabanta sa P250,000 ang balor sang lima ka bulto sang ginapatihan shabu.
Ginpasiguro naman sang tagdumalahan sang Vallacar Transit nga ginapatuman ang husto nga sistema sa pagbaton sang mga bagahe ukon package halin sa iban nga lugar pakadtu sa Iloilo.
Suno kay Mr. Joseph Uyco, administrative manager sang Vallacar Transit, magahimo sang kaugalingon nga imbestigasyon ang kompaniya sa ila mga konduktor kag drivers agud indi na masulit ang natabu. (AGB)