19 Civil Engineering students sa WIT, wala ginpasaka sa stage sa ila graduation; mga estudyante, nagpauli nga naghilibi-un
Iloilo City–Nagwangal ang ginikanan sang isa sa 19 ka mga estudyante sang Civil Engineering students sang Western Institute of Technology (WIT) sa Lapaz matapos wala ginpasaka sa stage ang ila kabataan sa graduation sang Abril 3.
Suno kay Myrna Danias, naka-ilis na ang ila mga bata kag ara na gid sila sa venue pero amo na lang ang ila kakibot sang wala ginlawag ang ila ngalan.
Tuman suno sa iya ang kalain sang buot sang mga bata kag bisan sila nga ginikanan.
Naghilibi-un nga nagpauli ang mga bata bangud wala sila naka-graduate.
Abril 2, isa ka adlaw antes ang graduation, ginpakuha sang removal exam ang mga bata pero wala sang dinahum-dahom kun ano ang resulta.
Abril 3, nagtambong sa graduation ang mga bata pero wala nakapakita ang manunudlo nga si Lorena Chavez. Wala nakasaka sa stage ang mga bata.
Abril 4 kag 5 ginpahayag nag-set sang meeting si Chavez sa mga ginikanan pero wala man ini nagsipot.
Suno kay Danias, tani ginprangka sila sang maestra para wala man naglaum ang mga estudyante.
Nagguwa ang impormasyon nga may cheating nga natabu sang nagkuha sang removal exam ang mga bata.
Ginpadulungan sang Aksyon Radyo Iloilo ang WIT agud makuhaan sang iya bahin si Chavez pero wala pa ini nakaabot sa eskwelahan. (JoMaque)