Report nga may ‘signing bonus’ para sa mga bag-o recruit nga NPA members, indi matuod suno sa PRO 6

Camp Delgado, Iloilo City–Wala sang kamatuoran ang naguwa nga impormasyon nga nagapasalig sang P10,000 tubtub P20,000 nga “signing bonus” ang New People’s Army sa mga bag-o recruit nga miembro sang grupo.

Suno kay Chief Inspector Joem Malong, spokesperson sang Police Regional Office 6, gin-verify kag gin-validate nila ang impormasyon kag negatibo ang resulta.

Posible suno kay Malong nga pakagat ukon gina-intu lang sang NPA ang mga pumuluyo paagi sa pagpaguwa sang impormasyon apang indi man paghatagan sa ulihi.

Wala man suno sa iya sang kuhaan sang kuwarta ang NPA agud ihatag sa ila mga bag-o nga recruits.

Gin-engganyo ni Malong ang publiko nga indi magpahaylo bangud maguba lang ang ila puturo.

Ginapasanyog na sang PRO 6 ang information dissimenation paagi sa pagpalapta sang mga flyers nga nagapahibalo sa publiko nga indi magpadala-dala sa amu nga istorya. (AGB)